Sunday, January 1, 2023

වියෝග, විප්ලව එක්ක ගෙවුන වසරක සමාලෝචනය

 

අවුරුද්දක් අවසානයටත් ඇවිත්.. සෑහෙන දේවල් සිද්ධ උන අවුරුද්දක්. රටේ වගේ ම මගේ පැත්තෙන් ගත්තත්.. රිවීව් එකක් ලියන එක මම සාමාන්‍යයෙන් කරන දෙයක් උනත්, මේ පාර ලියන්න දේවල් ගොඩක් නිසා, රටේ ලෝකේ වෙච්ච දේවල් වලින් අහුමුළු වල උන දේවල් ගැන වැඩිය කතා නොකර ඉන්න හිතුවා.

මේ සැරේ ජනවාරි මාසේ අවුරුද්ද පටන් ගත්තේ අවුරුදු දෙකක විපිරියාස වලින් පස්සේ තරමක් සාමාන්‍ය විදියට. හැබැයි ළඟ එන දරුණු ආර්ථික අවපාතයක ඉඟි ටිකක් එක්කම.. පහුගිය අවුරුදු දෙකේ කොරෝනා එක්ක කල් පැනපු අධ්‍යයන වර් (පාසල්/ විශ්වවිද්‍යාල) එක්ක, 2021 සාමාන්‍ය පෙළ, උසස් පෙළ විභාග පවා කල් ඇදිලා මේ අවුරුද්දට වැටුනා. ඒ නිසා අපි 2021 පටන් අරගත්ත 11R කියන පන්ති ක්‍රමවේදය මේ වසරටත් එහෙම ම අරගෙන එන්න උනා. ඔය අතරම, 10 වසර උඩට ඇවිත් මම වසර දෙකකින් පස්සේ නැවතත් පන්ති භාර ගුරුවරයෙක් උනා, 10F පන්තියේ. 

ගුවන් විදුලි වැඩසටහනකට යන්න අවස්තාව ලැබුනා. ඒකත් මේ බ්ලොග් එක නිසා..

අවුරුද්ද පටන් ගනිද්දිම ඉතිං කොරෝනා ඉන්ජෙක්ෂන් ගහන්නයි, ඊට පස්සේ ඒ කාලේ රටේ තිබ්බ අර්බුධ එක්ක පවර් කට්, ප්‍රවාහන කේස් අනංමනං එක්ක තමා අවුරුද්දේ මුල හරිය ඇදුනේ. ස්පෝට්ස් මීට් එක එහෙමත් කරා හැබැයි වැඩිය අවුලක් නැතුව. ඔහොම යද්දී තමා අරගල පටන් ගත්තේ. මුලින්ම එක පළාතකට පවර් අවුට් වෙන්නේ නැති එකට පටන් ගත්ත අරගල ගැන ගොඩක් තැන් වල ගොඩක් විස්තර ලියවුන නිසා ආයෙත් මෙතනත් කතා කරන්නේ නැහැ. 

පේරාදෙණිය තෙල් පෝලිම.. 

අරගල කතා.. 

ඔය අරගල එක්ක සමහර විට ඇඳිරි නීති වැටුනා, ඒ අස්සේ එක පාරට බස් එහෙම ස්ට්‍රයික් ඇවිත්, වෑන් වල එහෙම යන්න නැතුව, දුම්රිය නිලධාරීන් එක්ක කතා කරලා මැදිරි ඇදගෙන දුම්රිය හදාගෙන ආපු දවසුත් නැතුවාම නෙවෙයි. 

දුම්රිය පහසුකම් සාදාගෙන ගෙදර ඒම..

 

පා පැදියෙන් පාසලට..

ඔය අහු අස්සේ අපරාදේ පොත් වල සල්ලි - හුචස් පෙළ (2021 විභාගේ ඈ) ඉවර වෙලා අවුරුදු කිට්ටු වෙද්දී තමා මිනිස්සුන්ට අර් බුධය දැනෙන්න ගත්තේ ටිකක්. මොකද අවුරුදු දෙකක් ගෙවල් වලට කොටු වෙලා ඉඳලා ටිකක් සමරන්න පුළුවන් අවුරුද්දක් ආවම ඒක කරගන්නත් බෑ නේ. කෑම, ඇඳුම් එහෙම කෙලින්ම ෆයර් මැතමැටික්ස්.. ඔන්න කස්ටිය බැස්සා පාරට. කොහොම හරි වෙසක් එහෙම පහු වෙලා ජූලි වගේ වෙනකොට ආණ්ඩුවක් ජනාධිපති එක්කම ගෙදර යන්න වෙන තරමට මේක ප්‍රබල උනා. ඒ කතා වීඩියෝ අනංමනං එක්කම හතර වටේ ගියා නේ.. 

අරග ලේ..

බයිසිකලේ ට අවුරුදු.. ඩයිනමික් බ්‍රේක්

සුළුවට රඟපාන්නත් චාන්ස් එකක් වැදුනා.. ඉස්කෝලේ පන්තියේ යාලුවෙක් නිසා..

හැබැයි ඔය අහු අස්සේ මගේ වැඩ නම් නැවතුනේ නැහැ. ඉස්කෝලේ ස්පෝට්ස් මීට් එකෙන් පස්සේ පිරිත, ඊට පස්සේ දහම් පාසලේ වැඩ, විශ්ව විද්‍යාලයේ, ඉංජිනේරු පාඨමාලාවේ වැඩ එහෙම වෙනද වගේම කෙරීගෙන ගියා. ඉස්කෝලේ වාර විභාග තිබ්බා, ප්‍රශ්න පත්‍ර බැලුවා, දෙමාපිය හමු තිබ්බා, ඔයිට අමතරව දැනට අවුරුදු කිහිපයක ඉඳන් හදාගෙන එන බුද්ධ ධර් උපකාරක කෙටි සටහනත් මේ පාර ටිකක් වැඩි වැඩ එක්ක ළමයි ටිකක් එක්ක සම්පූර් කරලා, සාමාන්‍ය පෙළ (2021 අවුරුද්දේ විභාගේ තිබ්බේ මැයි) ළමයින්ට දීගන්න පුළුවන් උනා. 

ලේ ත් දුන්නලු..

මගේ ඉංජිනේරු පාඨමාලාවට අදාළ ප්‍රායෝගික පුහුණු කටයුතු සඳහා මාස 6ක් අනිවාර් යය ක්ෂේත්‍ර පුහුණුවක් ලබාගත යුතුයි. මේක 2019 අවුරුද්දේ කරන්න හිටියත් ලෝකල් බින් ලාඩන්ලයි ඊට පස්සේ චීනෙක්ට වවුල් සුප් බොන්න හිතිලා ඊට පස්සේ අවුරුදු දෙකෙයි කරගන්න බැරි උනා. මේ අවුරුද්දේ ඒ ගැන වැඩ පටන් ගත්තා ජූලි මාසෙන් පුහුණුව පටන් ගන්න බලාගෙන. 

අවුරුදු 12ක ට එහා ඉඳන් මගෙන් ඉගෙනගත්ත ගෝලයෝ දෙන්නෙක් ට ශිෂ්‍ය නායිකා පදවි හම්බුන දවස.. ඇත්තටම ගුරු සේවයේ ඉද්දි මේවා තමා සතුටු වෙන්න එන අවස්ථා..

යාන්ත්‍රික ඇඳීම පිලිබඳ දැනුවත් කිරීමේ සම්මන්ත්‍රණය 

මෝටර් යාන්ත්‍රික සංගමයේ අවසාන රැස්වීම..

අවසන් සේවා දිනය..

හැබැයි ඉතිං ලාංකේය දුම්රිය සේවයේ කාර් යක්‍ෂම නිලධාරීන් නිසා (ඇත්තටම නිලධාරීන් දෙන්නෙක් නිසා), ඒ කටයුත්ත පටන් ගැනීම අගෝස්තුත් පහු වෙලා ඔක්තෝබර් වෙනකල් ම ඇදුනා. කොහොමින් කොහොම හරි, ඉස්කෝලෙන් මාස 6ක් නිවාඩු අරගෙන, ජීවිතේ එක හීනයක් වෙච්ච ශ්‍රී ලංකා දුම්රිය සේවයට අනුයුක්ත වීම (පුහුණුවන ශිල්පියෙක් හැටියට හරි) සැබෑ කරගන්න හැකි උනා. මේ සටහන ලියවෙද්දීත් මම ඉන්නේ එතන. 

අමු වැස්සේ නව සේවා ස්ථානයට.. ශ්‍රී ලංකා දුම්රිය සේවය- ප්‍රධාන යාන්ත්‍රික ඉංජිනේරු උප දෙපාර්තමේන්තුව- රත්මලාන.

 

පළමු පරීක්ෂණ ධාවන චාරිකාව - S8 - 840 සමග අලුත්ගම වෙත..

රත්මලාන දුම්රිය කර් මාන්තශාලාව වෙත පැමිණි තාක්ෂණවේදය විෂයය හදාරන සිසු පිරිස.

 

ඊට අමතරව ඉස්කෝලේ ළමයි අරගෙන වෝටර් රොකට් කම්පිටිෂන් වලට ගියා, විවාද තරඟ වලට ගියා (සමහර ඒවාට මමත් විනිශ්චය මණ්ඩලයේ ඉඳන් සහයෝගයක් දුන්නා), රත්මලාන දුම්රිය කර් මාන්තශාලාවට ෆීල්ඩ් විසිට් එක්ක ගියා, වාග් ප්‍රතිභා විවාද තරඟයත් තිබ්බා. ඒ වගේම මෙතන විස්තරයක් නොලියවුනාට, 2012 වසරේ අශාන් එක්ක ගිය බලන- රඹුක්කන හයික් එක රිපීට් කරා, ඉස්කෝලේ සර් කෙනෙක් එක්ක (සහන සර්) පූජාගල නැග්ගා, තව අශාන් එක්කම නානුඔය- ග්‍රේට් වෙස්ටන් හයික් එකක් ගියා. මේ අවුරුද්දේ තමා වැඩිම කොළඹ - නුවර ගමන් ප්‍රමාණයක් ගියේ. ඒ වගේම, මගේ කෝච්චි සීසන් එකට තව ගමනාන්තයක් එකතු උනා. 

වාග් ප්‍රතිභා - 2022

 

ජල රොකට් තරඟය..

පූජාගල 

මෙහෙත් ගියා ලු...

බලන -රඹුක්කන පා ගමන..  

මැදවල විදුහලේ ශිෂ්‍ය ශිෂ්‍යාවන් වෙනුවෙන් කථික වැඩමුළුවක්..

ඕවා ඔහොම වෙද්දී, එංගලන්තේ මහා රැජින - දෙවෙනි එලිසබෙත් රැජින, මේ ලියන වෙලාවේ දැනගත්ත විදියට දහසය වෙනි බෙනඩික් හිටපු පාප් වහන්සේ වගේ ලෝක නායකයො, ගෞරවනීය පුද්ගලයෝ අපි අතරින් සමුගත්තා. තව පාපන්දු ලෝක කුසලාන තුනක් ජයග්‍රහණය කරපු කණ්ඩායම් නියෝජනය කරපු එකම ක්‍රීඩකයා- පේලේ ත් ඊයේ ලෝකෙන් සමු අරගෙන තිබ්බා.

ඒ වගේම තවත් දෙයක්- අපි හැමෝම ආදරේ කරපු ඇන්ටනොව් - 225 එකම ගුවන් යානය, රුසියා- යුක්රේන් යුද්ධෙට මැදි වෙලා විනාශ උන පුවත අපිට අවුරුද්ද මැද අහන්න ලැබුනා.  

ඇන්ටනොව් - 225 

ඒ වගේම අපේ රටේ  නිහාල් නෙල්සන් වගේ ප්‍රසිද්ධ පුද්ගලයින් කිහිප දෙනෙකුගේ අභාවය, ඉන්දියාවෙන් ආපු දුම්, ධාරානිපාත වැසි, නාය යාම්, එක දිගට දුම්රිය පීලි පැනීම් වගේ ගොඩක් සිද්ධි වාර්තා උනා. සුනාමියෙන් විනාශ උන ගාල්ල ක්‍රිකට් ක්‍රීඩාංගණය නැවත හදන්න උදව් කරපු ඕස්ට්‍රේලියානු ජාතික ක්‍රිකට් ක්‍රීඩක ෂේන් වෝන් ගේ අභාවය, ඔය මුරලිදරන් එක්ක තිබ්බ අවුල් එක්ක අපේ ඒ කාලේ පරම දුෂ්ටයා ලේබල් එක වැදිලා තිබ්බත් සෑහෙන දැනුන සිදුවීමක් උනා. 

නෑ නෑ පිටසක්වල යානයක් නෙවෙයි.. මේ ඇවිල්ලා මහා රෑ Tamping Machine එකක් බලන්න ගිය එකක්..

තව මේ අවුරුද්දේ ලියන්න තියන්නේ දේවල් දෙක තුනයි (ඈ.... එච්චර ද යකෝ උනේ අහන්න එපා ඉතිං. ජීවිතේ හැම දෙයක් ම මේකේ දාන්න බෑ නේ). එකක් තමා මේ අවුරුද්දේ මම අලුත් ජංගමයෙක් ගත්තා. ඇපල් අයිෆෝන් SE 2 එකක්. තව ෆුට් සයිකල් එකට කෑලි ටිකක් ගත්තා (ගත්තට තාම හයි කරේ නෑ හැබැයි).. ආ ෆුට් සයිකලේ කියද්දී මතක් උනේ. ඔය අවුරුද්ද මැද හරියේ දවසක ගෙලිඔය ටවුම කිට්ටුව මම ගිහිං තුන්සක රියක වැදුනා.. ලොකු අවුලක් උනේ නෑ, ඒත් කාලෙකින් සිද්ධ වෙච්ච රිය අනතුරක මතකයක් එකතු කරා (2012 රත්නපුරේදී පාලමක් පල්ලේ ගියාට පස්සේ ද කොහෙද).

ආය ඉතිං ලියන්න තියන්නේ, මිනිස්සු ගැන තමා. යාළුවො යෙහෙළියෝ, නෑයෝ එහෙම හිටු කියල බැඳගෙන බැඳගෙන ගියා, ඒ මගුල් දෙක තුනකටත් යන්න හම්බුනා. මිනිස්සු ගැන ලියනකොට මෙතනට දාන්න ම ඕනේ කියල හිතුන එකක් ලියනවද නැද්ද කියලත් ඉඳල, ලියල තියන්නම් කියල හිතුවා. 

කේසර මල්ලිගේ විවාහය 

අපි සමහර වෙලාවට අපේ ලඟම නෑයෝ, නැත්තම් අපේම නෑයෝ වගේ ලං කරගන්න යාළුවො/ යෙහෙළියෝ ගැන කල්පනා කරනවා, කවදාවත් අපිට නරකක් නොකරයි, අපිව තනි නොකරයි, අතාරින්නෙ නැති වෙයි කියල. හැබැයි මම හිතන්නේ මේ අවුරුද්දේ ඉගෙනගත්ත වටිනාම පාඩමක් තමයි, ඔය හැමෝම ඉන්නේ තමන්ට උදව් තියනකල් විතරයි කියන එක. ඒ ගැන හොඳම උදාහරණයක් මේ අවුරුද්දේ හම්බුනා. මම සිද්ධිය විස්තර කරන්න නම් යන්නේ නැහැ, හැබැයි මතක තියාගන්න හොඳ දෙයක් තමයි, උදව් ඉවර උනාම සහෝදරකමුත් ලෙප්ට් වෙනවා කියන එක.

අනික් එක, කොච්චර කල් ආශ්‍රය කරත්, මොන විදියේ බැඳීමක් තිබ්බත් (නෑයෝ/ යාළුවො), මනුස්සයෙක් ට වෙනස් වෙන්න යන්නේ බොහොම සුළු කාලයයි. ඉතිං මේ අවුරුද්දේ ඔලුවට හොඳටම දැනුන පාඩමක් තමයි, කිසිම කෙනෙක් ඕනෙවට වඩා ලං කරගන්න එපා, ඕනෙවට වැඩිය කරන්න යන්න එපා කියන එක. මොකද කිව්වොත් එහෙම ඉඳල වෙනස් උනාම දරාගන්න සෑහෙන්න අමාරු වෙලා, දරුණු තීරණ වලට පවා එළඹෙන්න පුළුවන්.

හරි, එහෙමනම් අවුරුද්දේ සාරාංශය තමා ඔය (ලියපු දේවල් වලට වඩා නොලියවුන දේවල් සෑහෙන්න වැඩියි). අන්තිමට ම, මේ අවුරුද්දේ මාත් එක්ක හිටපු, දුක සැප බෙදාගත්ත හැමෝටම ස්තුතියක් කරන්නම ඕනේ. විශේෂයෙන් ම මට දුම්රිය සේවයට අනුයුක්ත වෙලා පුහුණුව ලබාගන්න උදව් කරපු රකිත අයියා, විරාජ් මහත්මයා, ඒ වගේම රසික අයියා, අරජුන අයියා, දුෂ්‍යන්ත් මල්ලි, පුලස්ති අයියා ඇතුළු යාළුවො ටිකයි, අපේ සුවේන්ද්‍රා නැන්දම්මා, පුහුණු අංශයේ පරිපාලන නිලධාරීතුමිය, ඒ වගේම ප්‍රධාන යාන්ත්‍රික ඉංජිනේරුතුමාගේ ඉඳන් ලංකා ජරමන් දුම්රිය කාරමික අභ්‍යාස ආයතනයේ සහ ශ්‍රී ලංකා දුම්රිය සේවයේ රත්මලාන කර්මාන්තශාලාවේ අඳුරන, අඳුරගත්ත හැමෝවමයි මතක් කරන්න ම ඕනේ. නම් වශයෙන් ගහන්න ගියා නම් වෙනම පෝස්ට් එකක් ලියන්න වෙනවා ඒ ලිස්ට් එක.

ඒ වගේම, අපේ ඉස්කෝලේ විදුහල්පතිතුමා, උප විදුහල්පතිතුමන් සහ සහෝදර ආචාරය මණ්ඩලයත් මතක් කරන්න ඕනේ මම ඉල්ලපු පරක්කුවෙන් සේවයෙන් නිදහස් කරලා යන්න දුන්නට සහ මගේ වැඩ ටිකත් අමතර බරක් කියල නොසලකා කරට අරං කරගෙන යන එකට..

ඒ වගේම, මාත් එක්ක හැමදාම ඉන්න මිත්‍රයො සෙට් එකයි, ඉස්කෝලෙයි දහම් පාසලෙයි ගෝලබාල සෙට් එකයි මතක් කරන්නම ඕනේ. මොකද මම නැති උනා කියල විෂයය අතාරින්නෙ, පැමිණිලි කරන්නේ මුකුත් නැතුව ඒ බරින් ඔළුව නිදහස් කරගෙන මට මගේ වැඩ ටික කරගෙන යන්න දුන්නට (මම සිලබස් එක ඉස්සරහට ඇදල ගියේ).

ඉතිං ඒ මේ ඔක්කොමත් එක්ක, 2022 කියන්නේ සෑහෙන බරපතල දේවල් සිද්ධ උන අවුරුද්දක්. 2012 ට වඩා සෑහෙන්න වෙනස් අවුරුද්දක්. මගේ බ්ලොග්කරණයටත් දශකයක් දැන්. මම එද්දී ලියවුන බ්ලොග් ඔක්කොම වගේ දැන් අක්‍රීය වෙලා. දිගටම ලියවෙන පරණ බ්ලොග් නැති තරම් දැන්. ඒ අස්සේ ජනෙල් 10ට එන ගිනි නරියා බ්‍රවුසර් එකෙන් බ්ලොග් වලට කමෙන්ට් දාන්න බෑ. මේක ලියන්නෙත් පරණ ලැප් එකෙන්. 

සුබ ගමන් කලු..

 

අපි බලමු, 2023 අවුරුද්ද කොහොම වෙයි ද කියල. එහෙනම්, ලියන කියවන හැමෝටම, සුබ අලුත් අවුරුද්දකට ආසිරි! 

20 comments:

  1. සියලු යහපත් සිතුම් පැතුම් ඒ ආකාරයෙන්ම ඉටුවන සුභ නව වසරක් වේවා!

    වෙන්න ඕනෙ කෙසේද එසේම වේවා! 💪❤

    ReplyDelete
    Replies
    1. ගොඩක් ස්තුතියි! මේ අවුරුද්දෙත් හයික් දෙක තුනක් යමු..

      Delete
  2. සුබ අලුත් අවුරුද්දක් වේවා අයියේ!

    ඒක නෙමෙයි, මල්ලිලාගේ වෙඩින් පොටෝ දාන එකේ ඔය අයියගේ වෙඩිමේ පොටෝවක් කවදා වගේ අපිට බලාගන්න පුළුවන් වෙයිද දන්නෑ නේ............... ?

    ReplyDelete
    Replies
    1. ලබන පෙරේදා වගේ පුළුවන් වෙයි..

      Delete
  3. ලස්සන මතක සටහනක්. ලිව්වට ස්තූතියි.

    ReplyDelete
    Replies
    1. ඩයිනමික් බ්‍රේක් කියන්නෙ මොකක්ද? පිංතූර ටික නියමයි. ජර්මන්-ටෙක් එකේ දුම්‍ රිය තාක්ෂණ අංශයක් තිබෙන බව දැනන් හිටියෙ නෑ. ජර්මන්-ටෙක් එකට ශේන්වෝන්ලගෙ රටේ හොඳ පිළිගැනීමක් තියනවා ;)

      //හැබැයි මතක තියාගන්න හොඳ දෙයක් තමයි, උදව් ඉවර උනාම සහෝදරකමුත් ලෙප්ට් වෙනවා කියන එක//
      මසුරං කියමනක්. අන්තිමට "තමන් හිසට තම අතමය සෙවනැල්ල" බව තේරුම් ගැනීම, අමාරුවෙන් හරි, බැරි දේට කෙලින්ම "බැහ්" කියන්න පුරුදු වීම සරීර සවුක්කියට ගුණදායකයි.

      Delete
    2. ඩයිනමික් බ්‍රේක් කියන්නේ කෝච්චි වගේ බර වාහන වල (දැන්නම් කාර් වගේ එහෙමත් තියනවා) වේගය අඩු කරන්න යොදාගන්න ක්‍රමයක්. මේක කෝච්චියේ නම් ක්‍රම දෙකකට කෙරෙනවා. ඝර්ෂණ බලය වෙනුවට, සම්ප්‍රේෂණ පද්ධතිය භාවිතා කිරීම තමයි මේකෙදි කරන්නේ.
      සරලව විදුලි (දුම්රියේ නම් ඩීසල් - විදුලි) ක්‍රමය පැහැදිලි කරොත්, වාහනේ රෝද කරකවන මෝටර් එක (ට්‍රැක්ෂන් මෝටර්), ජෙනරේටර් එකක් විදියට ක්‍රියාත්මක කරවනවා. එතකොට නිපදවෙන විදුලිය ප්‍රතිරෝධක සෙට් එකක් හරහා යවලා පුච්චලා දාලා, ජෙනරේටර් එකට ලෝඩ් එකක් සපයල ඒ ජෙනරේටර් එක කැරකෙන එකට බාධාවක් කිරීම තමා කරන්නේ. මේකට රියෝස්ටැටික් බ්‍රේක් කියලත් කියනවා.
      වාහන/ විදුලි දුම්රිය වලදී කරන්නේ මේ උපදින ශක්තිය ආපහු බැටරි/ විදුලි ග්‍රිඩ් එක ට දෙන එක. මේක ට රීජෙනරේටිව් බ්‍රේක් කියනවා. මම ඔතනට ඔය වචනේ දැම්මේ ඩයිනමෝ එකක කාර්යයත් ආසන්න විදියට ඒ වගේ නිසා.
      ඩීසල් - ද්‍රවශක්ති ක්‍රමයේදී කරන්නේ ද්‍රව සම්ප්‍රේෂණයේ පාවිච්චි වෙන ව්‍යාවර්ථ පරිවර්තකය (ටෝක් කන්වර්ටර් එක) පාවිච්චි කරලා ඒ තෙල් එක ට තාපය විදියට ශක්තිය අරගෙන, එතනින් හීට් එක්ස්චේන්ජර් එකකින් රේඩියේටර් සර්කිට් එක හරහා වායුගෝලයට මුදාහැරීම කරන්නේ.
      මේකෙන් තිරිංග පලු නොගෙවී වාහනයක වේගය අඩු කරගන්න පුළුවන්. පාලනය කරගන්න ලේසි. මේ බොහොම කෙටියෙන් කිව්වේ.

      Delete
    3. ශ්‍රී ලංකා ජර්මන් කාර්මික අභ්‍යාස ආයතනය සහ ශ්‍රී ලංකා ජර්මන් දුම්රිය කාර්මික අභ්‍යාස ආයතනය කියන්නේ වෙන වෙනම ක්‍රියාත්මක වෙන ආයතන දෙකක්.

      Delete
    4. දුම්රිය සේවය හා ගමන් විස්තර ගැන කියවන්න මමත් කැමතියි

      Delete
    5. මේ බ්ලොග් එකේ දුම්රිය තොරතුරු යටතේ බලන්න..

      Delete
  4. සුබ අඟහරුමය 2023 වසරක් වේවා !
    මේ වසරෙත් පතාගෙන ඉන්න දේ ඉටුවේවා !

    ReplyDelete
    Replies
    1. සුබ පෘථිවිමය අවුරුද්දක් වේවා!

      Delete
  5. ඔබටත් නීරෝගි සුවය හා ජව සම්පන්නයෙන් යුතුව සියලු සිතුම් පැතුමන් ඉටුවන නවවසරක් වේවා...

    ReplyDelete
    Replies
    1. ගොඩක් ස්තුතියි සුබ පැතුමට!

      Delete
  6. නව වසර සුබ වේවා!! අඩේ අවුරුද්දක වෙච්චි දේවල් එක තැනක ඉඳන් ලියන්න තියෙනං හොඳයි කියලා මේක බැලුවහම හිතුනා.

    ReplyDelete
    Replies
    1. මමත් හැම අවුරුද්දෙම වගේ රිවීව් එකක් ලියනවා අයියා. බ්ලොග් එක පටන් ගත්ත අවුරුද්දේ ඉඳන් ම ලිව්වා. එතකොට දැනට අවුරුදු 10ක තියනවා. එක දිගට කියවන එකත් වෙනම හැඟීමක්..

      Delete
  7. අවුරුද්දේ වැඩ ලියන්න ගියොත් වැඩිවෙයි. මටනම් ග්‍රීසියට ගිය ගමන් තමා හොඳම. සුභ පැතුම් නව වසරට

    ReplyDelete
    Replies
    1. මමත් සමහර දේවල් හලලා අතෑරලා ලිව්වේ.. ස්තුතියි සුබ පැතුමට!

      Delete